त्रि.वि. संस्कृत विभागद्वारा मेयर चिरीबाबु सम्मानित

समाचार

गृहपृष्ठ
समाचार

त्रि.वि. संस्कृत विभागद्वारा मेयर चिरीबाबु सम्मानित

समाचारदाता शुक्रबार, भदौ ६, २०८२

त्रिभुवन विश्वविद्यालय-अन्तर्गतको संस्कृत केन्द्रीय विभागले शुक्रवार ‘पुरस्कार तथा कृतज्ञताज्ञापन समारोह’ सम्पन्न गरेको छ । त्रि.वि. संस्कृतकै उप–प्राध्यापक रोहिणीराज तिमिल्सिना अनुसार यस कार्यक्रमको मुख्य उद्देश्य ललितपुर महानगरप्रति औपचारिक कृतज्ञता अर्पण गर्नुका साथै योगविज्ञान अधिस्नातक (PGD) तहमा उत्कृष्ट उपलब्धि हासिल गर्ने विद्यार्थीहरूलाई सम्मान गर्नु थियो ।

समारोहको आरम्भ अतिथिहरूलाई रुद्राक्ष, खादा र व्याच अर्पण गर्दै वैदिक परम्पराअनुसार दीपप्रज्ज्वलन र मन्त्रपाठद्वारा गरिएको थियो । त्यसपछि राष्ट्रियगान, शोधच्छात्र सुमन चालिसे र सहपाठीहरूको वैदिक मन्त्रवाचन, डा. क्षितिज बराकोटीको स्वागत–सम्बोधन तथा अनिल थापाद्वारा प्रस्तुत स्वागत–भजनले कार्यक्रमलाई थप गम्भीरता र गरिमा प्रदान गरेको थियो ।

कार्यक्रममा विद्यार्थीहरूको विविध प्रस्तुति आकर्षणको केन्द्र बनेका थिए । टङ्कप्रसाद पन्थी, मीना राउत, कविता पाठक, विकला घिमिरे, सुमन आचार्य, सिर्जना श्रेष्ठ, आरति ढकाल र ज्ञानु घिमिरे-लगायतले योगनृत्य तथा आसनात्मक योगिक प्रस्तुति प्रस्तुत गरे भने स्नातकोत्तर तहका छात्रा डा. सरु महर्जन, ज्ञानु घिमिरे र एलिसा शाहीले नेवारी नृत्य प्रस्तुत गरेका थिए । यस्तै तेस्रो सामिसत्रका जीना श्रेष्ठसहितका विद्यार्थीहरूले समेत सुन्दर यौगिक प्रस्तुति दिएका थिए ।

पुरस्कार वितरणतर्फ, ललितपुर महानगरपालिकाको तर्फबाट योगविज्ञान PGD २०७९/८० को प्रथम र द्वितीय सामिसत्रका उत्कृष्ट विद्यार्थीहरूलाई जनही ५० हजार रुपैयाँका दरले नगद पुरस्कार प्रदान गरिएको थियो । यसअन्तर्गत प्रथम सत्रकी सर्वोत्कृष्ट अन्जु श्रेष्ठ र द्वितीय सत्रका सनतकुमार न्यौपानेलाई प्रमुख अतिथि मेयर चिरीबाबु महर्जन, सभाध्यक्ष तथा विश्वविद्यालयका उच्च पदाधिकारीहरूले संयुक्त रूपमा सम्मान गरे । दुवै पुरस्कृतले आफ्नो अनुभव सुनाउँदै विभागीय अभ्यास–केन्द्रित कार्यक्रमले पाएको सामुदायिक सहकार्यलाई विशेष प्रशंसा गरेका थिए ।

कार्यक्रममा विशेषत: दुई सम्मान अर्पण गरिए । पहिलो, ललितपुर महानगरका मेयर महर्जन र महानगरपालिकाप्रति विभागीय कृतज्ञता व्यक्त गर्दै कदरपत्र प्रदान गरिएको थियो । सो कदरपत्र सभाध्यक्ष प्रा. डा. नारायणप्रसाद गौतम एवं उपकुलपति प्रा. डा. दीपक अर्यालमार्फत हस्तान्तरण गरिएको थियो भने संस्कृत विभागका उपप्राध्यापक रोहिणीराज तिमिल्सिनाले वाचन गरेका थिए । दोस्रो, हालै नियुक्त उपकुलपति प्रा. डा. दीपक अर्याललाई विभागको तर्फबाट सम्मानपत्र अर्पण गरिएको थियो, जसको वाचन विभागकै उपप्राध्यापक उद्घोषक गोविन्द घिमिरेद्वारा गरिएको थियो ।

उपकुलपति अर्यालले आफ्नो मन्तव्यमा संस्कृत तथा पूर्वीय ज्ञान–विज्ञानलाई समयानुकूल ढङ्गले सुदृढ बनाउने प्रतिबद्धता व्यक्त गर्दै विभागलाई पूर्वाधार विकास, अनुसन्धान–उन्मुख कार्यक्रम र शैक्षिक गुणस्तर अभिवृद्धिमा संस्थागत सहयोग गर्ने घोषणा गरे । प्रमुख अतिथि महर्जनले विश्वविद्यालय, महानगरपालिका र समुदायबीचको सहकार्यलाई दीर्घकालीन बनाउँदै योगविज्ञानका दक्ष जनशक्ति उत्पादनमा निरन्तर लगानी गरिने बताए । साथै, ललितपुर महानगरद्वारा संस्कृत विभागमा प्रदान गरिएको छात्रवृत्तिबाट उत्पादन भएको दक्ष जनशक्तिले ‘योगमय ललितपुर’ निर्माणमा महत्वपूर्ण योगदान पुर्‍याएको भन्दै सन्तोष व्यक्त गरे ।

विद्यार्थी प्रतिनिधि ज्ञानभक्त डङ्गोलले विभागीय अध्ययन–अध्यापन र अभ्यासमूलक कार्यक्रमबारे विद्यार्थीको धारणा र अपेक्षाहरू प्रस्तुत गरे । समारोह विभागाध्यक्ष प्रा. डा. नारायणप्रसाद गौतमको अध्यक्षतामा सम्पन्न भएको थियो भने कार्यक्रम सञ्चालन उप–प्राध्यापक गोविन्द घिमिरेले गरेका थिए । ‘पूर्णमदः पूर्णमिदम्…’ वैदिक मन्त्रोच्चारणसँगै औपचारिक कार्यक्रम सम्पन्न गरिएको थियो ।

अन्तमा सहभागीहरूका लागि चियापान र योगिक परम्परा-अनुसार ‘अमृतभोजन’को व्यवस्था गरिएको थियो, जसले कार्यक्रमलाई आध्यात्मिकता र आत्मीयताको थप रङ्ग प्रदान गरेको थियो ।

प्रकाशित मिति: शुक्रबार, भदौ ६, २०८२