नेपाल वेद विद्याश्रमले जनार्दन-स्मृति संस्कृत दिवसको रनिङ ट्रफी जित्यो

समाचार

गृहपृष्ठ
समाचार

नेपाल वेद विद्याश्रमले जनार्दन-स्मृति संस्कृत दिवसको रनिङ ट्रफी जित्यो वक्तृत्वकला प्रतियोगितामा वाग् गुरुकुलकी आचल बसेल प्रथम

समाचारदाता शनिबार, भदौ १४, २०८२

25-(1)-1756544052.jpg

1-(3)-1756543607.jpg

14-(2)-1756543607.jpg

16-(1)-1756543606.jpg

आठौँ जनार्दन-स्मृति संस्कृत दिवस अन्तर्गत आयोजित राष्ट्रव्यापी अन्तर्विद्यालयीय प्रतियोगितामा नेपाल वेद विद्याश्रमले उत्कृष्ट प्रदर्शन गर्दै विजेता घोषित भएको छ । श्लोकवाचनमा प्रथम, भजनगायनमा गायनमाधुर्य उपाधि तथा वक्तृत्वकला विधामा उत्कृष्ट वक्ताको उपाधि प्राप्त गर्दै उक्त संस्थाले रनिङ ट्रफी आफ्नो नाममा दर्ता गरेको हो । संस्कृतज्ञ स्व. जनार्दन घिमिरेको स्मृतिमा डीएवी (दयानन्द एङ्लो वैदिक) विद्यालय, जावलाखेलद्वारा आयोजित दिवसमा देशभरका २१ संस्कृत गुरुकुल तथा आधुनिक विद्यालयहरूबाट विद्यार्थीहरूको सक्रिय सहभागिता रहेको थियो ।

कार्यक्रममा तीन विधामा अन्तर्विद्यालयीय प्रतियोगिता आयोजना गरिएको थियो- संस्कृत वक्तृत्वकला, श्लोकवाचन र भजनगायन । वक्तृत्वकला प्रतियोगितामा वाग् गुरुकुलकी आचल बसेल प्रथम, महेश संस्कृत गुरुकुलका विनयश्री सापकोटा द्वितीय, संस्कृत माध्यमिक विद्यालयका महेन्द्र आचार्य तृतीय तथा नैमिषारण्य गुरुकुलका प्रणव ढुङ्गेल प्रोत्साहन स्थानमा रहे ।

श्लोकवाचनमा नेपाल वेद विद्याश्रम प्रथम, महेश गुरुकुल द्वितीय, जगद्गुरु आदर्श गुरुकुल तृतीय तथा जुगल नव गुरुकुल प्रोत्साहन स्थानमा रहे । श्रीवेङ्कटेश गुरुकुलका निर्मल खनालले स्वरमाधुर्य उपाधि प्राप्त गरे । भजनगायनमा एपेक्स लाइफ स्कूल प्रथम, नैमिषारण्य गुरुकुल द्वितीय, पाणिनि विद्यालय तृतीय तथा खुशी बीके (जुगल नव गुरुकुल) प्रोत्साहन स्थानमा रहिन् । गायनमाधुर्य उपाधि नेपाल वेद विद्याश्रमलाई प्रदान गरियो ।

कार्यक्रमका प्रमुख अतिथि नेपाल संस्कृत विश्वविद्यालयका प्राध्यापक डा. जगतप्रसाद उपाध्यायले स्व. जनार्दन घिमिरेलाई “संस्कृतप्रेमी विद्वान् तथा संस्कृत प्रचार–प्रसारका अथक साधक”का रूपमा स्मरण गर्दै उनका ग्रन्थ र संस्कृत ग्राम स्थापनाका प्रयासहरूलाई विशेष रूपमा उल्लेख गरे । उनले संस्कृतलाई भाषा मात्र नभई संस्कृति, विज्ञान र सभ्यताको आधारका रूपमा व्याख्या गरे ।

सभाध्यक्ष डीएवी अध्यक्ष अनिल केडियाले संस्कृतशिक्षाको आत्मिक, नैतिक र सांस्कृतिक महत्त्वबारे प्रकाश पार्दै स्व. जनार्दन घिमिरेसँगको आत्मीय सम्बन्धलाई स्मरण गरे । उपप्राचार्य रामचन्द्र खनालले सहभागी विद्यालय तथा अतिथिप्रति आभार व्यक्त गर्दै संस्कृत ग्राम स्थापनाको अभियानलाई निरन्तरता दिनुपर्नेमा जोड दिए ।

कार्यक्रमको समापन सत्र डीएवी संस्कृत विभाग प्रमुख पुरुषोत्तम रिजाल र शिक्षक निरञ्जन खतिवडाले सञ्चालन गरेका थिए । विद्यालयले जनार्दन-स्मृति संस्कृत दिवसले संस्कृत भाषा, साहित्य र सभ्यताको संवर्द्धनमा उल्लेखनीय योगदान पुर्‍याएको जनाएको छ ।

स्व. जनार्दन घिमिरे, जो रेडियो कान्तिपुरको प्रातःकालीन भक्ति–अनुष्ठानका लोकप्रिय प्रस्तोता थिए, डीएवीमा संस्कृत विभाग प्रमुख, प्रमुख प्रशासकीय अधिकृत तथा त्रि.वि. संस्कृत विभागमा उप–प्राध्यापकको रूपमा कार्यरत थिए । २०७४ वैशाख २८ गतेको बस दुर्घटनापछि जेठ २ मा उनको अल्पायुमै निधन भएको थियो ।

प्रकाशित मिति: शनिबार, भदौ १४, २०८२