भ्रष्टाचारविरोधी युवा आन्दोलनबाट ओली सरकार फालिएपछि सुशीला कार्कीको नेतृत्वमा अन्तरिम

राजनीति

गृहपृष्ठ
राजनीति

भ्रष्टाचारविरोधी युवा आन्दोलनबाट ओली सरकार फालिएपछि सुशीला कार्कीको नेतृत्वमा अन्तरिम

समाचारदाता शुक्रबार, भदौ २७, २०८२

राष्ट्रपति रामचन्द्र पौडेलले अन्तरिम सरकारको प्रधानमन्त्रीमा सुशीला कार्कीलाई नियुक्त गरी शपथ समेत गराएका छन् । राष्ट्रपति भवन शीतल निवासमा आज राति अबेर आयोजित विशेष समारोहमा राष्ट्रपति समक्ष उनले पद तथा गोपनीयताको शपथ लिएकी हुन् । राष्ट्रपति पौडेलले विषम र असाधारण परिस्थितिमा युवा पुस्ताले प्रकट गरेका माग र आकांक्षाअनुसार, राजनीतिक दल र सरोकारवालाको परामर्शमा उनलाई प्रधानमन्त्रीमा नियुक्त गरेका हुन् । नेपालको संविधानअनुसार राष्ट्रपतिमा निहित अधिकार प्रयोग गरी संविधानको पालना, संरक्षण र राष्ट्रिय एकताको प्रवर्द्धन गर्न आवश्यक भएकाले छ महिनाभित्र अर्को निर्वाचन सम्पन्न गराउनेगरी अन्तरिम सरकारको प्रधानमन्त्रीमा तिमीलाई नियुक्त गरिएको हो । संविधानमा यसरी नियुक्त गर्ने व्यवस्था छैन तर जेन जी आन्दोलनका कारण यसरी नियुक्त गरिएको हो ।

शपथ समारोहमा उपराष्ट्रपति, प्रधानन्यायाधीश, नेपाल सरकारका उच्च पदस्थ अधिकारीहरू, सुरक्षा निकायका प्रमुखहरू, नेपालस्थित कूटनीतिक नियोगका प्रतिनिधिहरू उपस्थित थिए । जेनजीले उठाएका मागहरूमा सहमति जुटेसँगै पूर्वप्रधानन्यायाधीश कार्की प्रधानमन्त्रीमा नियुक्त भएकी हुन् । नवनियुक्त प्रधानमन्त्रीका रूपमा उनले सानो मन्त्रिमण्डल गठन गर्नेछन् र उनले गर्ने सिफारिशका आधारमा सरकारका प्राथमिकताका थप कामहरू अघि बढाइनेछ ।

जेनजीले मुलुकमा सुशासन, नयाँ पुस्ताको नेतृत्व र निस्क्रिय तुल्याइएको सामाजिक सञ्जालको पुनः सञ्चालनको माग राख्दै आह्वा गरेको आन्दोलन र त्यसपछिका घटनामा ठूलो जनधनको क्षति भएको थियो । उक्त घटनापछि तत्कालीन प्रधानमन्त्री केपी शर्मा ओलीले राजीनामा दिएर भागेका थिए । त्यसपछि आन्दोलनको मागअनुसार उनको नेतृत्वमा नयाँ सरकार गठन गरिएको हो ।

मुलुकमा अचानक बदलिएको राजनीतिक परिस्थिति र अन्यौलको वातावरणमा नेपाली सेनाको पहलमा क्रमशः कानुनी राज्य र अमनचयन कायम गर्दै वार्ता र संवादका माध्यमबाट नयाँ सरकार गठनमा सफलता मिलेको हो । सेनाले इतिहासदेखि नै प्राप्त जिम्मेवारीलाई संविधानसम्मत ढङ्गबाट प्रजातान्त्रिक मूल्य–मान्यताका आधारमा बहन गर्दै आएको छ । निकै जटिल अवस्थामा संयम भएर छोटो समयमा परिस्थितिलाई सहजरूपमा अवतरण गराउन सफल भएको छ ।

नेपालको पहिलो महिला प्रधानन्यायाधीशका रूपमा उनी कार्यपालिका प्रमुख अर्थात् पहिलो महिला प्रधानमन्त्री बन्न सफल भएकी हुन् । यसअघि उनी लामो समय वकालत गर्दै सर्वोच्च अदालतको न्यायाधीश हुँदै प्रधानन्यायाधीश बनेका थिइन् । न्यायालयभित्र प्रष्ट विचार, खरो स्वभाव र इमानदार छवि बनाएका कार्कीको नेतृत्वमा सरकारले प्राप्त समयाधिभित्र स्वच्छ, स्वतन्त्र र निष्पक्ष निर्वाचन गराई नयाँ सरकारलाई सत्ता हस्तान्तरण गर्नेछ ।

प्रकाशित मिति: शुक्रबार, भदौ २७, २०८२