अन्तरिम सरकार चार सदस्यीय बन्यो, शपथ सम्पन्न

राजनीति

गृहपृष्ठ
राजनीति

अन्तरिम सरकार चार सदस्यीय बन्यो, शपथ सम्पन्न

समाचारदाता सोमबार, भदौ ३०, २०८२

प्रधानमन्त्री सुशीला कार्कीले आफ्नो मन्त्रिपरिषदलाई चार सदस्यीय बनाएकी छन् । तीन जनालाई मन्त्रीमा नियुक्त गररेपछि उनको अन्तरिम सरकार चार सदस्यीय भएको हो । ती नवनियुक्त मन्त्रीहरुले आज पद तथा गोपनीयताको शपथ लिए । राष्ट्रपति रामचन्द्र पौडेलले राष्ट्रपति कार्यालय शीतल निवासमा आज आयोजित विशेष समारोहमा नवनियुक्त मन्त्रीहरु रामेश्वर खनाल, कुलमान घिसिङ र ओमप्रकाश अर्याललाई शपथ गराए । राष्ट्रपति पौडेलले अन्तरिम सरकारकी प्रधानमन्त्री कार्कीको सिफारिसमा उनीहरुलाई हिजो साँझ नियुक्त गरेका थिए ।

नवनियुक्त मन्त्रीहरूमध्ये खनाललाई अर्थ, घिसिङलाई ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास, अर्याललाई गृह र कानुन, न्याय तथा संसदीय मामिला मन्त्रालयको जिम्मेवारी तोकिएको छ । बाँकी मन्त्रालयको कार्यभार प्रधानमन्त्री कार्कीले नै सम्हालेकी छन् । खनाल पूर्वअर्थ सचिव, घिसिङ नेपाल विद्युत् प्राधिकरणका पूर्वकार्यकारी निर्देशक र अर्याल अधिवक्ता हुन् ।

खनालले आर्थिक सुधार र सुशासनका क्षेत्रमा काम गर्दै आएका छन् भने घिसिङले प्राधिकरणको जिम्मेवारीबाट हटेपछि नागरिकका आवाज उठाउँदै आएका छन् । अधिवक्ता अर्यालले अख्तियार दुरुपयोग अनुसन्धान दुरुपयोगका तत्कालीन प्रमुख आयुक्त लोकमानसिंह कार्कीको नियुक्तिको अयोग्यतासम्बन्धी मुद्दामा पुनरावेदन हालेपछि उच्च नैतिक चरित्रको व्याख्या गर्दै सर्वोच्चले लोकमानलाई अयोग्य ठहर गरेको थियो ।

शपथ समारोहमा उपराष्ट्रपति रामसहायप्रसाद यादव, प्रधानमन्त्री कार्की, प्रधानन्यायाधीश प्रकाशमानसिंह राउत, राष्ट्रियसभाका अध्यक्ष नारायणप्रसाद दाहाल, पूर्वप्रधानमन्त्री डा बाबुराम भट्टराई, संवैधानिक निकायका प्रमुख तथा पदाधिकारी, नेपाल सरकारका उच्चपदस्थ अधिकृत, सुरक्षा निकायका प्रमुख तथा अधिकारीलगायत उपस्थित थिए । तर सभामुख देवराज घिमिरे र उपसभामुख इन्दिरा राना अनुपस्थित थिए ।

जेन जी आन्दोलनबाट नेपाली कांग्रेस र एमालेका नेताहरू लखेटिएपछि उत्पन्न परिस्थितिका बीच राष्ट्रपति पौडेलले पूर्वप्रधानन्यायाधीश कार्कीलाई यही भदौ २७ गते अन्तरिम सरकारको प्रधानमन्त्रीमा नियुक्त गरेका थिए ।

प्रकाशित मिति: सोमबार, भदौ ३०, २०८२