संयुक्त राष्ट्र संघमा नेपालले जनायो जेन जीले सत्ता पल्टाएको कुरा

समाचार

गृहपृष्ठ
समाचार

संयुक्त राष्ट्र संघमा नेपालले जनायो जेन जीले सत्ता पल्टाएको कुरा

समाचारदाता मंगलबार, असोज १४, २०८२

संयुक्त राष्ट्रसङ्घको ८० औँ महासभामा प्रधानमन्त्रीको सट्टा नेपालका स्थायी प्रतिनिधि लोकबहादुर थापाले नेपाली प्रतिनिधि मण्डलको नेतृत्व गरेका छन् । आफ्नो साम्बोधनको क्रममा थापाले नेपालमा सुशासनको माग गर्दै हालै जेन जी आन्दोलन भएको र आन्दोलनको माग अनुसार नेपालले काम गर्ने प्रतिबद्धता विश्व समुदाय समक्ष व्यक्त गरे । उनले सुशासन, शान्ति, लोकतन्त्र र समावेशी सहभागितासहित विकासको बाटो अवलम्बन गरी नेपाल अघि बढिरहेको बताP । संयुक्तराज्य अमेरिकाको न्यूयोर्कमा जारी महासभाको ८०औँ अधिवेशनलाई उनले सोमबार नेपालका तर्फबाट सम्बोधन गरेका हुन् ।

सम्बोधनका क्रममा उनले मुलुकमा विकसित पछिल्ला राजनीतिक घट्नाक्रमका बारेमा जानकारी गराएको अमेरिकास्थित नेपाली स्थायी नियोगले जनाएको छ । नेपाली युवा पुस्ता (जेन जी)ले पारदर्शी, जवाफदेही, जनउत्तरदायी र सुशासनका आधारस्तम्भमा टेकेर निष्पक्ष, न्यायपूर्ण र समृद्ध राष्ट्र निर्माणको माग गरेको स्थायी प्रतिनिधि थापाले जानकारी गराए । नेपालको इतिहासमा पहिलोपटक महिला प्रधानमन्त्रीको नेतृत्वमा राज्य सञ्चालन भइरहेको जानकारी दिँदै उनले सार्वभौम नेपाली जनताले नयाँ नेतृत्व छान्न पाउने अधिकारसहित आगामी फागुन २१ गते आम निर्वाचनको मिति तोकिएको बताए । संयुक्त राष्ट्रसङ्घलाई बहुपक्षीयताको आधार, शान्ति, न्याय, मानव स्वाभिमान, साझा समृद्धि तथा नियममा आधारित अन्तरराष्ट्रिय व्यवस्थाको आशा भएको उल्लेख गर्दै उहाँले त्यसका महत्वपूर्ण एवं आधारभूत मूल्यमान्यताहरूलाई जोगाउनुपर्नेमा जोड दिए ।

प्यालेस्टाइनको गाजा क्षेत्रमा चर्किंदो मानवतावादी सङ्कट र हमासद्वारा निर्दोष नागरिकलाई बन्धक बनाइएका घटनाप्रति चिन्ता एवं आपत्ति व्यक्त गर्दै उनले सन् २०२३ अक्टोबर ७ देखि हमासद्वारा बन्धक बनाइएका नेपाली नागरिक बिपिन जोशीलाई तुरुन्त मुक्त गर्न आग्रह गरे । महासभालाई सम्बोधन गर्दै स्थायी प्रतिनिधि थापाले विश्व शान्ति र सुरक्षाको प्रत्याभूति, बहुपक्षीयताको सुदृढीकरण र विश्वास पुनःस्थापना, दिगो विकास लक्ष्य कार्यान्वयनमा तीव्रता, अति कम विकसित देश तथा कमजोर मुलुकका लागि विकास तथा जलवायु वित्त, जलवायु न्याय, प्रविधि हस्तान्तरण, क्षमता अभिवृद्धि र समावेशी ‘डिजिटल’ रुपान्तरण प्रवद्र्धनलगायतका विषयमा विश्वव्यापी कार्यका लागि आह्वान गरे । केपी ओली जाने तयारी गरिरहेका बेला जेन जी आन्दोलनका कारण ओलीले सत्ता छोडेर भागेपछि अन्तरिम सरकार गठन भै थापालाई सम्बोधनका लागि खटाएको हो ।

प्रकाशित मिति: मंगलबार, असोज १४, २०८२