गाउँभरीमा एउटै धारो, १०३ घरका मानिसको गुजारा यसैबाट

समाचार

गृहपृष्ठ
समाचार

गाउँभरीमा एउटै धारो, १०३ घरका मानिसको गुजारा यसैबाट

बिहीबार, असोज २८, २०७८

देशैभर ‘एक घर एक धारो’ कार्यक्रमले व्यापकता पाइरहेको समयमा म्याग्दीको पुरण्य गाउँवासीका लागि एउटा मात्रै धारोले काम चलाउनु पर्ने बाध्यता छ । बेनी नगरपालिका वडा नं ५ स्थित सो गाउँमा १०३ दलित परिवारको वसोवास छ । ती परिवारका ४०० भन्दा बढी सदस्यले एउटा मात्र धारोबाट गुजारा चलाउँदै आएको वर्षौं बितिसकेको छ ।

६८ वर्षिया कालिका दर्जी भन्छिन्, “बिहान ४ बजेदेखि नै यहाँ भीड लाग्छ । ११ वर्षमा बिहे भएर यो गाउँमा आएकी हुँ, त्यतिबेलादेखि नै खानेपानीको समस्या जस्ताको यस्तै छ ।”

उनको जस्तै समस्या यस गाउँका सबै गृहिणीले भोग्दै आएका छन् । एक गाग्री पानी भर्नकै लागि एक घण्टाभन्दा बढी पर्खनु पर्छ । स्थानीय पार्वती दर्जीको गुनासो यस्तो छ, “घरको अरु काम गर्नै भ्याइँदैन । बिहान धारामै वित्छ । काममा जाने लोग्नेमान्छे र विद्यालय जाने केटाकेटीहरुलाई खाना पकाएर खुवाउन ढिला हुन्छ, अनि गाली आफूले खानुपर्छ । अरु गाउँका घरघरमा धारा छन्, हाम्रो गाउँमा गाउँभरीकै मान्छेका लागि जम्मा एउटा धारो छ ।”

यस गाउँमा पानीकै कारण झगडा समेत हुने गरेको पुलाचौरका शिव बानियाँले बताए । “एउटा मात्रै धारो, १०३ घर परिवार, पानी भर्नका लागि तँछाडमछाड त हुने नै भयो, अनि सुरु हुन्छ झगडा, मेरो पालो भन्दै एक जना अघि बढेपछि अर्को पछि हट्ने कुरै भएन, सबैलाई छिटो पानी भरेर घरको काम सक्ने हतारो हुन्छ । यहाँ पानीकै कारण दैनिक झगडा समेत हुने गरेको छ ” उनले भने ।

राजनीतिक दलका नेता र स्थानीय तहका जनप्रतिनिधिहरूले समेत चुनावका वेला मात्रै मीठा कुरा गर्ने गरेको र चुनावपछि वेवास्ता गर्ने गरेको उनीहरुको आरोप रहेको छ । “हाम्रो भोटले नै जितेर गएका जनप्रतिनिधिले चुनावको बेला बाहेक अरू समयमा हामीलाई फर्केर पनि हेर्दैनन्, खानेपानी र मोटरबाटोको लागि कति पटक यहाँका जनप्रतिनिधिलाई भन्यौं तर सुनेको नसुन्यै गरे” स्थानीय लालबहादुर परियारले भने ।

खानपानी समस्या समाधान गर्न उच्च प्राथमिकता दिएको बेनी नगरपालिकाको भनाइ छ । तर खानेपानीको स्रोत नै फेला नपरेकाले पुरण्यमा पानी पुर्‍याउन नसकिएको वडा नंका ५ का वडाध्यक्ष लक्ष्मण बानियाँ बताउँछन् । “पुरण्यमा खानेपानीको समस्या छ, तर खानेपानीको स्रोतको अभावमा त्यो समस्यालाई सम्बोधन गर्न सकिएको छैन । उहाँहरुलाई वेवास्ता गरेको भन्ने कुरै आउँदैन, श्रोतको खोजी भैरहेको छ, केही समय पछि उहाँको समस्या समाधानका लागि प्रयास शुरु हुने छ । ”

प्रकाशित मिति: बिहीबार, असोज २८, २०७८

प्रतिक्रिया दिनुहोस्