विप्लव नेतृत्वको नेकपाले आह्वान गरेको नेपाल बन्दको आंशिक प्रभाव, बन्द गराउँदै हिंड्ने कैयन् पक्राउ

समाचार

गृहपृष्ठ
समाचार

विप्लव नेतृत्वको नेकपाले आह्वान गरेको नेपाल बन्दको आंशिक प्रभाव, बन्द गराउँदै हिंड्ने कैयन् पक्राउ

समाचारदाता मंगलबार, कात्तिक ३०, २०७८

विप्लव नेतृत्वको नेकपाले पेट्रोलियम पदार्थमा भएको मूल्यवृद्धिको विरोधमा आह्वान गरेको नेपाल बन्दको प्रभाव आज देशका विभिन्न ठाउँमा आंशिक रूपमा परेको छ । राजधानी लगायत देशका विभिन्न स्थानमा उद्योग-कलकारखाना, विद्यालय तथा यातायात सेवामा यसको बढी असर परेको देखिन्छ । लामादूरीका यातायातका साधनहरू चल्न सकेका छैनन् ।

राजधानीमा विद्यालयहरू अधिकांश बन्दछन् भने यातायातका साधनहरू पनि सडकमा अन्य दिनहरूमाभन्दा पातलो देखिएको छ । मुख्य बजार क्षेत्रका पसल पनि आंशिक मात्रै खुलेका छन् । भित्री पसहलहरू भने खुलेका छन् ।

लुम्बिनी प्रदेशका रुपन्देही, दाङ, बाँके, पाल्पा, गुल्मी, अर्घाखाँची, नवलपरासी, कपिलवस्तुलगायतका जिल्लाको जनजीवन प्रभावित बनेको छ । बुटवलमा भने केही स्थानमा मात्र आन्दोलनकारी देखिएका छन् । मुख्य सडकका धेरै ठाउँमा आन्दोलनकारी छैनन् । ठाउँठाउँमा सुरक्षाकर्मीको पनि बाक्लो उपस्थिति छ ।

जवर्जस्ती बन्द गराउँदै हिंड्नेहरूबाट कुनै अप्रिय घटना हुन नदिन सुरक्षा व्यवस्था कडा पारिएको इलाका प्रहरी कार्यालय बुटवलका प्रहरी नायब उपरीक्षक ठगबहादुर केसीले बताएका छन् ।

यसैगरी दमौलीमा बन्दको प्रभाव बिहानैदेखि परेको छ । सडक र बजारमा खासै चहलपहल देखिएको छैन । नेपाल बन्दलाई सफल पार्न सडकमा निस्किएका कार्यकर्तालाई तनहुँ प्रहरीले पक्राउ गरेको छ ।

मंगलबार बिहान दमौलीबाट विप्लवका ११ जना कार्यकर्तालाई नियन्त्रणमा लिएको जिल्ला प्रहरी कार्यालय तनहुँका प्रहरी नायव उपरीक्षक युवराज तिमिल्सिनाले बताए ।

सदरमुकाम दमौलीस्थित ट्राफिक चोकबाट जिल्ला सेक्रेटरी एटम, व्यास नगर इन्चार्ज ओम पन्त, मजदुर संगठनको जिल्ला अध्यक्ष हिमाल खड्का, अखिल क्रान्तिकारी जिल्ला सचिव शिव सदाशंकर लगायतलाई प्रहरीले नियन्त्रणमा लिएको हो ।

बन्दको असर पोखरामा पनि परेको छ । प्रहरीले बिहानैदेखि सुरक्षा व्यवस्था कडा पारेको छ ।

बन्द गराउँदै हिँडेका नेकपा कास्कीका सदस्य काजी गुरुङ र अखिल (क्रान्तिकारी)पृथ्वीनारायण क्याम्पस समितिका उपाध्यक्ष युवराजसहित आठ जनालाई प्रहरीले नियन्त्रणमा लिएको छ ।

कास्कीका प्रहरी नायव उपरीक्षक सुन्दर तिवारीले पक्राउ परेकासँग सोधपुछ भइरहेको बताए ।

नेकपाका कार्यकर्ताले पोखराका विभिन्न चोक र सडकमा टायर बालेर प्रदर्शन गरेका छन् । सार्वजनिक यातायात खासै चलेका छैनन् भने निजी सवारीसाधन पनि फाट्टफुट्ट मात्रै गुडेका छन् । बजार पसल फाट्टफुट्ट मात्रै खुलेका छन् । अत्याश्यक ढुवानीका मालबाहक गाडी भने चलिरहेका छन् ।

यसैगरी बन्द सफल बनाउन भन्दै सवारी रोक्ने १० जनालाई चितवन प्रहरीले पक्राउ गरेको छ । विप्लव नेतृत्वको नेकपा निकट अनेरास्ववियु क्रान्तिकारीका वाग्मती प्रदेश इञ्चार्ज राजन साउदसहित नेता, कार्यकर्ता पक्राउ परेका छन् ।

जिल्ला प्रहरी कार्यालय चितवनका प्रवक्ता प्रहरी नायब उपरीक्षक सूर्यबहादुर थापाका अनुसार साउदसहित दुई जनालाई बिहान सबेरै भरतपुरको बाइपास रोड र अन्यलाई नारायणगढको लायन्स चोकबाट नियन्त्रणमा लिइएको हो । सुरक्षाकर्मी व्यापक परिचालन गरिएकाले बन्द कर्ताले सवारी आवागमनमा अवरोध पुर्‍याउन पाएका छैनन् । थापाले भने, “जिल्लाभर अवरोध गर्न खोज्नेलाई तत्काल पक्राउ गर्ने गरी सुरक्षाकर्मी परिचालन गरिएको छ ।”

बन्द आह्वानका कारण अन्य दिनमा झै सवारी साधन भने चलेका छैनन् । बिहानैदेखि बजार क्षेत्र सुनसान देखिएको छ ।

प्रकाशित मिति: मंगलबार, कात्तिक ३०, २०७८

प्रतिक्रिया दिनुहोस्