प्रधानन्यायाधीश जबरालाई महाभियोग लगाउन नेपाल बारको दलहरू तथा संसदीय नेतृत्वलाई ध्यानाकर्षण

समाचार

गृहपृष्ठ
समाचार

प्रधानन्यायाधीश जबरालाई महाभियोग लगाउन नेपाल बारको दलहरू तथा संसदीय नेतृत्वलाई ध्यानाकर्षण

समाचारदाता सोमबार, मंसिर ६, २०७८

नेपाल बार एसोसिएशनले प्रधानन्यायाधीश चोलेन्द्र शमशेर जबराको राजीनामा माग गर्दै गरेको आन्दोलनलाई थप सशक्त बनाउँदै लगेको छ । हाल सर्वोच्च अदालत परिसरमा दैनिक २ घण्टा धर्ना दिंदै आएको बारले भोलि देशभरका उच्च अदालतमा पनि धर्ना दिने भएको छ । प्रधानन्यायाधीश जबराले वार्ताको लागि आह्वान गर्नुभएको भए पनि बारले उहाँको राजीनामा नै आफ्नो बटमलाइन भन्दै वार्तामा बस्न अस्वीकार गरिसकेको छ ।

यसैबीच बारले जारी आन्दोलनप्रति संसद र राजनीतिक दलहरूको ध्यानाकर्षण गराउन औपचारिक रूपमा भेटेरै ज्ञापनपत्र दिन थालेको छ । बारका पदाधिकारीहरूले आज दलका नेताका साथै सभामुख अग्निप्रसाद सापकोटा र राष्ट्रिय सभाका अध्यक्ष गणेशप्रसाद तिमिल्सिनालाई समेत भेटेर प्रधानन्यायाधीश जबरालाई महाभियोग लगाएर हटाउन माग गर्दै ज्ञापन पत्र बुझाएका छन् ।

ज्ञापनपत्र बुझाउन गएका नेपाल बारका पदाधिकारीहरूसँगको भेटमा नेकपा एमाले संसदीय दलका उपनेता सुवास नेम्वाङले प्रधानन्यायाधीश चोलेन्द्र शमशेर जबरालाई महाअभियोग लगाउने प्रस्तावलाई पार्टीको बैठकमा राख्ने आश्वासन दिए ।

जबरालाई महाअभियोग लगाएर हटाउनुपर्ने मागसहित सोमबार नेपाल बार एसोसिएसनले बुझाएको ज्ञापनपत्र बुझ्दै नेम्वाङले बारको प्रस्तावलाई पार्टी अध्यक्ष र स्थायी कमिटी बैठकमा लैजाने आश्वासन दिएका हुन् ।

‘बारले उठाएका विषय गम्भीर छन् । जे भयो राम्रो भएन । यो ज्ञापनलाई अध्यक्ष र स्थायी कमिटीमा अविलम्ब आजै बुझाउँछु । पार्टीको ध्यानाकर्षण गराउने पहल मेरो रहन्छ’, नेम्वाङले भने ।

बारको आन्दोलनबारे औपचारिक जानकारी पाएको भन्दै उनले कानुन व्यवसायीको आन्दोलन मत्थर बनाउन दंगा प्रहरी प्रयोग गरिएकोमा दुःख व्यक्त गरे । न्यायालयको विवाद भित्रै समाधान गर्नुपर्ने भए पनि बाहिर आइसकेकाले अब समाधानको बाटोमा लाग्नुपर्ने उनले बताए ।

‘बारले यस्तो गर्नुपर्ने स्थिति नआएको भए हुन्थ्यो । अदालत र बार छलफल गरेको भए राम्रो हुन्थ्यो । तर, बाहिर आइसक्नुभयो । यो राम्रो होइन । अहिले सर्वाेच्चबाट न्याय पाउन नसकिने अवस्था छ । हामीले नै बोलिराखेको कुरा आएको छ । संसदमा भएका घटनामा पनि हामीले न्याय पाउन सकेनौं’, उनले भने ।

नेम्वाङलाई ज्ञापनपत्र बुझाउने क्रममा बार अध्यक्ष चण्डेश्वर श्रेष्ठले जबराले संविधानको व्यवस्थाअनुसार मात्र आफू बाहिरिने अड्डी लिएकाले उनलाई हटाउन महाअभियोग आवश्यक भएको बताए ।

नेपाल बारले बुझाएको ज्ञापनपत्र बुझ्दै प्रतिनिधि सभाका सभामुख अग्नि सापकोटाले निष्पक्षता, तटस्थता र स्वतन्त्र रूपमा पहल गर्ने बताएका छन् । उनले भने, ‘तीनवटै अङ्गको ओज, गरिमा कायम हुनुपर्छ । अहिले भइरहेको बहस नजिकबाट हेरेको छु ।’ उनले सहज र स्वभाविक निष्कर्ष निकाल्न सबै पक्ष गम्भीर हुनु पर्ने बताए । उनले समस्या किन गहिरिँदै गएको छ भन्नेमा चिन्ता पनि व्यक्त गरे ।

यसैगरी ज्ञापनपत्र बुझ्दै राष्ट्रिय सभाका अध्यक्ष गणेशप्रसाद तिमिल्सिनाले संवैधानिक दायरा, सीमा र दायित्वअनुसार अघि बढ्ने प्रतिबद्धता व्यक्त गरे । उनले भने, ‘बाँकी त माननीयज्यूहरूले गर्नु हुन्छ । संवैधानिक सीमाअनुसार म पनि पहल गर्छु ।’