विद्वत् शिरोमणि कुलचन्द्रका कृति कार्यान्वयनमा ल्याउन माग

समाचार

गृहपृष्ठ
समाचार

विद्वत् शिरोमणि कुलचन्द्रका कृति कार्यान्वयनमा ल्याउन माग गुरुकुल खोल्न र अन्तर्राष्ट्रिय संस्कृत सम्मेलन गर्न आग्रह

समाचारदाता आइतबार, मंसिर १९, २०७८

विद्वत् शिरोमणि कुलचन्द्र गौतमलाई अमर राख्ने उनका कृतिहरु जनस्तरमा पुर्‌याउन संस्कृत शिक्षा सम्बन्धी विभिन्न गतिविधि संचालन गर्न विद्वानहरुले सुझाउ दिएका छन् । गौतमको ६३ औं स्मृति दिवस एवं उनको नाममा स्थापित कुलचन्द्र गौतम स्मृति संस्थाको १४ औं वार्षिक साधारणसभाका वक्ताले गतिविध बढाउन सुझाएका हुन् ।

राणा शासनका बेला राजा र राणा दुवैलाई विदेशनीति सम्बन्धी सुझाउ दिने विद्वानका रुपमा लिइने कुलचन्द्रले संस्कृत, नेपाली र हिन्दीमा अनेकौं पुस्तक लेखेका थिए । तीमध्ये कतिपय पुस्तक प्रकाशन गर्ने क्रम केही वर्षदेखि जारी छ ।

उनका कृतिहरुमा पुरुषार्थ कल्पवल्ली (पद्य १९५६), अमरकोष (नेपाली टीका १९५८), स्वयंवैद्य (आयुर्वेद १९७२), अलङ्कार चन्द्रोदय (समालोचना १९७८), राघवालङ्कार (२०१६), तुलसीकृत रामायण (नेपाली १९९६), र संस्कृत-नेपाली शब्दकोश (२०५४) प्रमुख छन् । बेलायतमा बस्ने उनका नाति डा. प्रसन्नचन्द्र गौतमले आफ्ना हजुरबाको योगदानलाई अमर राख्न संस्था नै खोलेर सामाजिक गतिविधि संचालन गर्दै आएका छन् । हजुरबा कुलचन्द्रले भाषा, साहित्य, व्याकरण, आयुर्वेदमा गरेको योगदान अतुलनीय रहेको थाहा पाएपछि सामाजिक सेवाका काम अघि बढाएका मात्रै होइनन् विद्वानहरुको सहायतामा वेदको अनुवाद र वैदिक साहित्यको प्रकाशनमा पनि उनी प्रसन्नतासाथ जुट्दै आएका छन् ।

शनिबार काठमाडौमा आयोजित साधारणसभामा भने उनी उपस्थित थिएनन् । कोभिड महामारीको अवरोधका कारण उनी बेलायतमै रोकिन पुगेको सभालाई अवगत गराइएको थियो ।

कार्यक्रममा डा. काशीनाथ न्यौपाने¸ डा. लक्ष्मीप्रसाद खतिवडा, डा. सुबोध शुक्ला र सुबोधराज प्याकुरेलले विद्वत् शिरोमणि गौतम स्मृति संस्थाले संस्कृत तथा वैदिक गतिविधिमार्फत् समाजमा योगदान बढाउनु पर्ने सुझाउ दिएका थिए ।

रघुनाथ अधिकारीद्वारा संचालित सभामा महासचिव उषा गौतमले वार्षिक प्रगति प्रतिवेदन प्रस्तुत गर्दै धादिङ र सिन्धुपाल्चोकमा संस्थाले गरेका समाजसेवाका क्रियाकलापबारे पनि जानकारी गराएकी थिइन् । संस्थाका अध्यक्ष रामप्रसाद गौतमको अध्यक्षताको कार्यक्रममा कोषाध्यक्ष डा. बेनुबहादुर कार्कीले लेखापरीक्षण प्रतिवेदन प्रस्तुत गरेका थिए ।

विद्वत् शिरोमणि कुलचन्द्रका छोरा लक्ष्मीनाथ गौतम नेपाल राष्ट्र बैंकका दोस्रो गभर्नर थिए ।

वक्ताहरुले कुलचन्द्रको नाममा भिन्न खालको गुरुकुल खोलेर र अन्तर्राष्ट्रिय संस्कृत सम्मेलन गरेर उनका कृतिलाई कार्यान्वयनमा ल्याउनु पर्ने माग संस्थासमक्ष राखेका थिए ।

प्रकाशित मिति: आइतबार, मंसिर १९, २०७८