जुम्लामा एमबीबीएस् कक्षा सुरु

मुख्य समाचार

गृहपृष्ठ
मुख्य समाचार

जुम्लामा एमबीबीएस् कक्षा सुरु

समाचारदाता सोमबार, मंसिर २०, २०७८

कर्णाली स्वास्थ्य विज्ञान प्रतिष्ठानले आइतबारदेखि बहुप्रतिक्षित चिकित्सा शिक्षाको स्नातक तह (एमबिबिएस)को पढाइ सञ्चालन गरेको छ । सरकारले कर्णालीका दुर्गम क्षेत्रमा चिकित्सा शिक्षा र स्वास्थ्य सेवा पुर्‍याउने ध्येयले विसं २०६८ मा जुम्ला सदरमुकम खलङ्गामा प्रतिष्ठान स्थापना गरेकोमा स्थापनाको एक दशकपछि प्रतिष्ठान एमबीबीएस पठाई सञ्चालन गर्न सफल भएको हो ।

चिकित्सा शिक्षा आयोगको गत जेठ २९ गते सम्पन्न बैठकले प्रतिष्ठानलाई एमबिबिएस तहमा २० सिट अध्यापन गराउने स्वीकृति दिएको थियो । साथै आयोगले पहिलोपटक लिएको एकीकृत प्रवेश परीक्षामा उत्तीर्ण विद्यार्थीमध्ये प्रतिष्ठानका लागि निर्धारण गरिएका सिटमध्ये आइतबारसम्म १५ जना भर्ना भएका छन् । तीमध्ये छात्रा पनि रहेका जनाइएको छ ।

प्रतिष्ठानमा यसै शैक्षिक सत्रदेखि चिकित्सा शिक्षाको स्नातकोत्तर तह (एमडी) को पनि अध्यापन सुरु भइसकेको छ । सो तहमा भक्तपुरका डा. रहिस कोजु, काठमाडौँ निवासी डा. प्रशंसा ताम्राकार र कपिलवस्तुका डा. वेदकुमार चौधरी जनरल ‘एमडी इन जनरल प्राक्टिस तथा इमरजेन्सी मेडिसिन’ विषयमा अध्ययनरत छन् ।

यसैगरी धनगढी निवासी डा. ललितसिंह धामी एनेस्थेसिया र बारा कलैयाका डा. मुन्ना केशरी पेडियाट्रिक्समा एमडी तहमा अध्ययनरत छन् ।

प्रतिष्ठानमा यस वर्षदेखि स्नातक तहमा फार्मेसी (बी फार्मेसी), नर्सिङ विषयमा पनि अध्यापन सुरु गरिएको छ । ती दुवै विषयमा २०/२० विद्यार्थी अध्ययन गर्नेछन् । यसअघि नै प्रतिष्ठानमा विएनएस मिडवाइफ्रि र विपिएच पनि अध्यापन सुरु भइसकेको छ ।

प्रतिष्ठानले आयोगले लिएको एकीकृत प्रवेश परीक्षामा उत्तीर्णमध्ये १५ जना पूर्ण छात्रवृत्तिका विद्यार्थी र पाँचजना शुल्क तिरेर अध्ययन गर्ने विद्यार्थीलाई अध्यापन गर्ने जनाएको छ ।

प्रतिष्ठानले चिकित्सा विषयको उच्च तह अध्यापनका लागि ३०० शय्याको अस्पतालसमेत सञ्चालनमा ल्याइसकेको छ । अस्पतालमा १० शय्याको सघन उपचारकक्ष (आइसीयू) र ४ शय्याको शल्यक्रिया कक्ष छ ।

चिकित्सा शिक्षा अध्यापनका लागि प्रतिष्ठानमा ८२ जना विषयगत चिकित्सक कार्यरत रहेका जनाइएको छ ।

प्रकाशित मिति: सोमबार, मंसिर २०, २०७८

प्रतिक्रिया दिनुहोस्