गहुँ छर्ने बेला भयो, पाएनन् किसानले रासायनिक मल

समाचार

गृहपृष्ठ
समाचार

गहुँ छर्ने बेला भयो, पाएनन् किसानले रासायनिक मल

समाचारदाता सोमबार, मंसिर २७, २०७८

धानबाली भित्र्याएर गहुँ छर्ने तयारीमा रहेका किसानहरू अहिले रायासनिक मल नपाएर चिन्तित छन् । नेपालको तराई क्षेत्रका धेरै ठाउँमा धानबाली भित्र्याएपछि गहुँ बाली लगाइन्छ । यस वर्ष थन्क्याउने बेलाको धानवाली वर्षाले नष्ट गरिदिंदा मर्कामा परेका किसानहरू गहुँ छर्ने बेलामा पनि मल नपाउँदा थप निराश बनेका हुन् ।

मागअनुसारको मल नपाएपछि गहुँको उत्पादन पनि कम हुने चिन्तामा किसान छन् । धनुषाको हंशपुरका किसान शैलेन्द्र मुखिया भन्छन्, ‘मलका लागि गाउँको डिलरदेखि जनकपुरधामस्थित कृषि सामग्री कम्पनी लिमिटेडको कार्यालयसम्म पुगेँ, तर कहीँ मल पाउन सकिनँ । मल नै पाएपछि गहुँ खेती कसरी गर्ने भन्ने तनाव भएको छ ।’

रासायनिक मल आपूर्ति गर्दै आएको कृषि सामग्री कम्पनी लिमिटेडको जनकपुर कार्यालय केन्द्रले नै माग अनुसारको मल उपलब्ध नगराउँदा मलको अभाव हुँदै गएको बताउँछ । ‘वर्षेनी मलको माग बढ्दै गएको छ,’ कृषि सामग्री लिमिटेड जनकपुरका प्रमुख रामकुमार चौधरीले भने, ‘केन्द्रले सोअनुसारको मल उपलब्ध नगराउँदा यहाँका किसानले समस्या भोग्दै आएका छन् ।’

गत आर्थिक वर्ष ०७७-७८ मा कृषि सामग्री कम्पनी लिमिटेड जनकपुरले ६ हजार मेट्रिक टन युरिया र पाँच हजार मेट्रिक टन डीएपी मल माग गरेकोमा तीन हजार दुई सय मेट्रिक टन युरिया र चार हजार पाँच सय मेट्रिक टन डिएपी मात्रै केन्द्रले उपलब्ध गराएको थियो ।

चालू आर्थिक वर्षमा ५ हजार मेट्रिक टन युरिया र ४ हजार ५ सय मेट्रिक टन डीएपी मलको लक्ष्य रहे पनि अहिलेसम्म केन्द्रले २ हजार ९ सय ५ मेट्रिक टन युरिया र १ हजार ६ सय २७ मेट्रिक टन डीएपी मात्रै उपलब्ध गराएको उनले जानकारी दिए । प्राप्त मलमध्ये २ हजार ३ सय ५० मेट्रिक टन युरिया र १ हजार ५ सय ८५ मेट्रिक टन डीएपी बिक्री भइसकेको र ५ सय ५५ मेट्रिक टन युरिया र ४२ मेट्रिक टन डीएपी अहिले गोदाममा मौज्दात रहेको उनले बताए ।

कृषि ज्ञान केन्द्र धनुषाका अनुसार धनुषामा ४० हजार हेक्टर जमिनमा गहुँ खेती हुँदै आएको छ ।

प्रकाशित मिति: सोमबार, मंसिर २७, २०७८

प्रतिक्रिया दिनुहोस्