पुस ८ देखि १७ सम्म नवलपुर खाना तथा पर्यटन महोत्सव हुने

अर्थ-वाणिज्य

गृहपृष्ठ
अर्थ-वाणिज्य

पुस ८ देखि १७ सम्म नवलपुर खाना तथा पर्यटन महोत्सव हुने महोत्सवमा जङ्गल सफारी, प्याराग्लाइडिङ् र नारायणीमा जलयात्रा पनि

समाचारदाता आइतबार, पुस ४, २०७८

नवलपरासी (बर्दघाट–सुस्तापूर्व)को कावासोतीमा नवलपुर खाना, पर्यटन, संस्कृति तथा व्यापारिक महोत्सव हुने भएको छ । होटेल व्यवसायी सङ्घ नवलपुरको आयोजनामा हुने सो महोत्सव यही पुस ८ देखि १७ गतेसम्म सञ्चालन हुने छ ।

महोत्सवमा नवलपुरमा रहेका जनजातिको खानाका साथै प्याराग्लाइडिङ, चितवन राष्ट्रिय निकुञ्जको मध्यवर्ती क्षेत्रमा जङ्गल सफारी र नारायणी नदीमा डुङ्गा सफारी लगायतका कार्यक्रम राखिएको सङ्घका अध्यक्ष सन्तोष रानाले जानकारी दिए ।

कावासोती–८ स्थित खेल मैदानमा हुने महोत्सवमा करिब २०० प्रदर्शनी कक्ष रहने छन् । महोत्सवको तयारीसँगै स्थानीय सञ्चारमाध्यमबाट प्रचारप्रसार तथा माइकिङ गर्नेदेखि ब्यानर, स्वागतद्वार निर्माणसहितका काम अगाडि बढाइएको छ ।

महोत्सवमा आकर्षणका रूपमा रहने प्याराग्लाइडिङ कावासोतीको बालुवाडाँडाबाट गराइनेछ । कावासोतीको बालुवाडाँडाबाट हात्तीखोरसम्म प्याराग्लाइडिङको सफल परीक्षण भइसकेको छ । बालुवाडाँडाबाट गराइने प्याराग्लाइडिङमा एक जना व्यक्तिले करिब २५ मिनेट समय बिताउने छन् । दैनिक १० देखि ३५ वटासम्म फ्लाइट गर्न सकिने गरी तयारी भएको र त्यसका लागि पाँच जना पाइलटसमेत निश्चित गरिएको आयोजकले जनाएको छ ।

महोत्सवमा थप आकर्षणका रुपमा बालउद्यानसहित विभिन्न सांस्कृतिक कार्यक्रम छन् । जिल्लामा पहिलो पटक आयोजना गर्न लागिएको खाना महोत्सवलाई हरेक वर्ष निरन्तरता दिइने आयोजक जनाएको छ । जनजातिको खाना तथा संस्कृति संरक्षण गर्दै पर्यटकलाई आकर्षित गर्नका लागि महोत्सव गर्न लागिएको अध्यक्ष रानाले बताए ।

प्रकाशित मिति: आइतबार, पुस ४, २०७८

प्रतिक्रिया दिनुहोस्