सुगम बन्दै कालिकोट, सडक सञ्जालमा जोडिए सबै पालिका

मुख्य समाचार

गृहपृष्ठ
मुख्य समाचार

सुगम बन्दै कालिकोट, सडक सञ्जालमा जोडिए सबै पालिका

समाचारदाता बिहीबार, पुस ८, २०७८

कालीकोट जिल्लाका नौ वटै स्थानीय तह सडक सञ्जालमा जोडिएका छन् । रास्कोट नगरपालिका, खाडाचक्र नगरपालिका, तिलागुफा नगरपालिका, महावै गाउँपालिका, शुभकालिका गाउँपालिका, सान्त्री त्रिवेणी गाउँपालिका, पचालझरना गाउँपालिका र नरहरिनाथ गाउँपालिका सडक सञ्जालले जोडिएको हुन् ।

जिल्लाका नौ स्थानीय तहका ८२ वडामध्ये प्रायः सबै वडामा सडक सञ्जालले जोडिएकाे रास्कोट नगरपालिका उपप्रमुख मिमसरा बम शाहीले बताइन् । ‘हाम्रो नगरका पनि सबै वडा सडक सञ्चालमा जोडिएका छन्,’ उनले भनिन्, ‘मूल सडक कालोपत्रे हुँदैछ ।’

खाडाचक्र नगरपालिकामा पनि ११ वटै वडामा सडक पुगेको उपप्रमुख विजया बिष्टले जानकारी दिए । ‘स्थानीय सरकार बनेपछि हामीले सबै वडामा सडक पुर्‍याएका छौं ।’ उनले भनिन्, ‘सडकले जोडिएका वडामा त्यहाँ उत्पादन भएका वस्तु बजारीकरण गर्न सजिलो भएको छ ।’

यस्तै तिलागुफा नगरपालिकाका ११ वटै वडा सडक सञ्जालले जोडिएको नगरपालिका प्रमुख रतनबहादुर शाहीले बताए । सान्त्री त्रिवेणी गाउँपालिकाका ९ वटै वडा, पलाँता गाउँपालिकाका ९ वटै वडा, पचालझरना गाउँपालिका ९ वटै वडा सडक सञ्जालले जोडिएका छन् ।

नरहरिनाथ गाउँपालिकाका ९ वटामध्ये ५ वटा वडा सडक सञ्जालले जोडिएको र ४र वटा वडामा यसै आर्थिक वर्षमा सडक सञ्जालले जोडिसक्ने त्यसका लागि धमाधम काम भइरहेको गाउँपालिका अध्यक्ष धीरबहादुर बिष्टले बताए । उनका अनुसार वडा नम्बर १, २, ३, ८ र ९ कोटबाडा–कुमालगाउँ सडकले जोडिएका छन् भने वडा नम्बर ४, ५, ६ र ७ सडक सञ्जालमा जोडिन बाँकी रहेको छ ।

शुभकालिका गाउँपालिका र महावै गाउँपालिकामा केही वडाबाहेक अन्य वडा सडक सञ्जालले जोडिएको शुभकालिका गाउँपालिकाका अध्यक्ष खडानन्द चौलागाईले जानकारी दिए । यसै आर्थिक वर्षमा सबै वडामा सडक पुर्‍याउने लक्ष्य रहेको उनले बताए ।

प्रकाशित मिति: बिहीबार, पुस ८, २०७८

प्रतिक्रिया दिनुहोस्