राष्ट्रिय गौरवको सोलु कोरिडोर १३२ केभी डबल सर्किट प्रसारण लाइन निर्माण सम्पन्न

मुख्य समाचार

गृहपृष्ठ
मुख्य समाचार

राष्ट्रिय गौरवको सोलु कोरिडोर १३२ केभी डबल सर्किट प्रसारण लाइन निर्माण सम्पन्न आगामी जनवरी भित्रै सञ्चालनमा आउने

समाचारदाता बिहीबार, पुस १५, २०७८

राष्ट्रिय गौरवको सोलु कोरिडोर १३२ केभी डबल सर्किट प्रसारण लाइन निर्माण सम्पन्न भएको छ । उदयपुरको कटारी नगरपालिका–४ मरुवास्थित स्थानीयवासीले एलाइन्मेन्ट परिवर्तन गर्न माग गर्दै साढे तीन वर्षदेखि अवरुद्ध पार्दै आएकोमा आयाेजनाले उनीहरूकाे माग सम्बोधन गरेपछि रोकिएको काम पूरा भएकाे हाे ।

प्रसारण लाइन तयार नहुँदा गत माघ ०७६ देखि व्यवसायिक उत्पादन थालेको सोलुखोला जलविद्युत आयोजनाको २३.५ मेगावाट विद्युतमध्ये ४.५ मेगावाटबाहेक सबै खेर गइरहेको थियाे ।

सोलुखुम्बुको तिङ्लादेखि सिरहाको मिर्चैयासम्म ८९.५ किलोमिटर लम्बाइको प्रसारण लाइनमा पर्ने ३०२ वटा टावर निर्माण र तार तान्ने काम सम्पन्न भएको हो । आठौं पटक थपिएको म्याद सकिनु दुई दिनअघि निर्माण सम्पन्न भएको हो । पछिल्लो पटक थपिएको म्याद ३१ डिसेम्बर २०२१ सम्म थियो ।

टावर निर्माण र तार तान्ने काम सम्पन्न भएपछि अब तारमुनि पर्ने रुखहरू काट्ने काम भई रहेको आयोजना निर्माण कम्पनीका सम्पर्क अधिकृत दीपक गौतमले जानकारी दिए । आगामी जनवरीभित्र सबै काम सम्पन्न गरी उक्त प्रसारण लाइनलाई व्यावसायिक रूपमा सञ्चालनमा ल्याउने योजना रहेको उनले बताए ।

सोलु करिडोर १३२ केभी डबल सर्किट आयोजना ३० महिनाभित्र निर्माण सम्पन्न गर्ने गरी २५ सेप्टेम्बर २०१६ मा सम्झौता भइ काम सुरू गरेको थियाे । तर विभिन्न कारणले काममा ढिलाई हुँदैजाँदा आयोजनाको काम ३१ डिसेम्बर ०२१ मा सक्ने गरी आठौँ पटक म्याद थप गरेको थियो ।

कटारी नगरपालिका-४ मरुवा, सिम्ले, बर्मझियाका २३ घर परिवारले प्रसारण लाइनको एलाइन्मेन्ट परिर्वतन गर्न र त्यसो हुन नसके पछिल्लो मूल्य अनुसार जग्गाको मुआब्जा दिन माग गर्दै काममा अवरोध गर्दै आएका थिए । तीन वर्षअघि प्रतिकठ्ठा २० लाखको दरमा मुल्याङ्कन भएको जग्गाको अहिले नगरपालिकाले सिफारिस गरे अनुसार प्रतिकठ्ठा ५० लाख अनुसार मुआब्जा हुनु पर्ने माग उनीहरूको थियो ।

आयोजनाका अनुसार अब उक्त क्षेत्रका नम्बरी र ऐलानी जग्गाको छुट्टाछुट्टै मूल्य निर्धारण गरिएको छ । सरकारले सो क्षेत्रका स्थानीयलाई मुआब्जा वितरणका लागि चार करोड ५० लाख रुपैयाँ रकम निकासा गरेकोमा हालसम्म तीन करोड रुपैयाँ मुआब्जाबापत भुक्तानी दिई सकेकाे आयोजनाका सम्पर्क व्यक्ति गौतमले बताए । आयोजनाको निर्माण खर्च करिब दुई अर्ब ५० करोड रुपैयाँ पुग्ने गौतमको भनाइ छ ।

प्रकाशित मिति: बिहीबार, पुस १५, २०७८