गुरुकुलस्य सर्वांगीणविकासाय योगदानं विहितवतो माधवप्रसादपौडेलस्य सम्माने महेशच्छात्रपरिषदा श्रद्धाञ्जलिसभा समायोजिता

संस्कृत

गृहपृष्ठ
संस्कृत

गुरुकुलस्य सर्वांगीणविकासाय योगदानं विहितवतो माधवप्रसादपौडेलस्य सम्माने महेशच्छात्रपरिषदा श्रद्धाञ्जलिसभा समायोजिता

लक्ष्मण आचार्य मंगलबार, असोज ४, २०७९

महेशसंस्कृतगुरुकुलस्य सर्वांगीणविकासाय योगदानं विहितवतो माधवप्रसादपौडेलस्य सम्माने महेशछात्रपरिषदा श्रद्धाञ्जलिसभा समायोजिता अस्ति । अस्यैव आश्विनमासस्य तृतीये दिनांके सोमवासरे भगवतः श्रीपशुपतेः प्रांगणे संस्थिते श्रीशंकराचार्यमठे महेशछात्रपरिषदा उक्तश्रद्धाञ्जलिसभाया आयोजनं विहितमासीत् । गुरुकुलस्य संस्थापकसचिवस्य श्रीमाधवप्रसादपौडेलस्य गतमासस्य एकोनविंशे दिनांके पांचभौतिकशरीरस्य अवसानं संजातमासीत् । तस्य असामयिकनिधनेन समस्तगुरुकुलपरिवारः शोकसन्तप्त आसीत् ।

महेशछात्रपरिषदा समायोजिते उक्तश्रद्धाजलिसभायाञ्च गुरुकुलस्थानां स्वामिवर्याणाम्, आचार्याणां, छात्राणां, भक्तजनानां च महत्या संख्यया उपस्थितिरासीत् । उक्तसभा च तदीयस्मृतौ पूर्णरूपेण शोकमया संजाता आसीत् ।

कार्यक्रमस्य प्रारम्भे एव महेशछात्रपरिषदोऽध्यक्ष उमेशप्रसादघिमिरेवर्यः स्वीयस्वागतमन्तव्यप्रकटनेन साकं श्रीमाधवप्रसादपौडेलेन गुरुकुलं प्रति स्थापनाकालत इदानीं यावत् कृतस्य योगदानस्य संस्मरणं कुर्वन् कीतिर्यस्य स जीवति इति प्रसिद्धवचनानुसारं तेषाममरत्वञ्च प्रतिपादयन् यावत्पर्यन्तं गुरुकुलस्य स्थितिः भविष्यति तावत्पर्यन्तं तेषामपि स्थितिर्भवत्येव इत्यादिभावप्रकटनेन साकं पितृतुल्याय तस्मै अश्रुपूर्णभावेन श्रद्धासमर्पणञ्च विहितवान् आसीत् ।

श्रीमाधप्रसादपौडेलस्य स्मृतौ तेषामेव योगदानं विषयीकृत्य गुरुकुलस्य स्वामिवर्यैः, तत्रत्यैरेव कतिपयैः छात्रैश्च छन्दोबद्धरूपाणां कवितानां वाचनञ्च विहितमासीत् । तत अन्ते च गुरुकुलस्य समुन्नतये योगदानप्रदानमेव अस्माकं स्वामिचरणानां श्रीरामानन्दस्वामिनां एवं एतेषां पौडेलवर्याणां च कृते वास्तविकं श्रद्धाञ्जलिसमर्पणं भविष्यतीति वदता महेशसंस्कृतगुरुकुलस्यैव संरक्षकेन तपोनिष्ठेन श्रीमधुसूदनानन्दगिरिणा च सभायाः समापनं विहितमासीत् । श्रद्धाञ्जलीसभायाः सहजीकरणं तथा कार्यक्रमसंचालनञ्च महेशछात्रपरिषदः सदस्येन पर्वतराजघिमिरेवर्येण विहितमासीत् ।

308255352_762202784894183_3465394279178203829_n1663692980.jpg